هو دا معنى الرخامة

في الموضوع اللي فات طلبت من الإخوة الشعراء -زادهم الله بسطة في الشعر- إنهم يكتبوا بياناتهم (من أجل مزيد من التواصل بين الشعراء)!!!

ففوجئت إن ماحدش من الشعراء -زادهم الله بسطة في الشعر برضه- كتب أي ردّ على الموضوع، اللهم إلاّ واحد بس، دخل يبارك لي على البلوج، وهو الشاعر محمد مصطفى (ربنا يجبر بخاطره)، وكمان ماكتبش أي حاجة تخص بياناته الشعرية، ولا حتى بياناته المكرونة...

طبعاً بعد ما كتبت الموضوع ماقمتش من قدام الكمبيوتر... أنا رحت عملت لي كباية شاي وقلت لنفسي: يا واد يا رخم على ما تشرب كباية الشاي الفريسكا بتاعتك يكون عشرة خمستاشر واحد ردّوا عليك عشان -لا مؤاخذة- تتواصل معاهم...

قوم إيه، إذ أفوجأ إن مافيش ولا واحد دخل البلوج أصلاً!!! قلت يمكن العيب في كباية الشاي، فقمت عملت كباية تانية... طلع برضه الشاي مضروب... وتالته... لسه الشاي مضروب... غيّرت باكو الشاي، وباكو السكّر، وولّعت البوتاجاز بالكبريت بدل الولاّعة... لسه برضه مضروب....... واضح إن الشاي له تأثير كبير قوي على علاقة الشعراء بعضهم ببعض...

ولغاية الوقتي لسه مستني، وكبايات الشاي مستنية معايه، يمكن حدّ يعبّرنا...

ودا بصراحة حسسني قد إيه شعراء مصر بيحبوا التواصل بينهم وبين بعض...

يلاّ، ربنا يقدّرهم على التواصل

تواصل_قاعدة بيانات

الإخوة الأعزّاء
الموضوع دا أنا كتبته هنا رغبةً مني في تجميع أكبر قدر من الأصدقاء، ودا لأني بقالي فترة طويلة بعيد عن عالَم الإنترنت، ودا بيسبب لي ضيق وخنقة لإحساسي ببعدي عن كتير من أصدقائي... لأني جيت في وقت من الأوقات وسألت نفسي: لو عايز توصل لفلان، تعمل إيه؟؟؟ ولو عايز تكتب عن فلان، تكتب إيه؟؟؟
والمشكلة إن "فلان" بيبقى حد من الأصدقاء اتعرّفت عليه على النت، وبعدين غاب عني، أو غبت عنه، وماعدتش أعرف عنه أي حاجة.
أتمنى إن كل واحد من الأصدقاء -الشعراء على وجه الخصوص- يتكرم ويكتب في الصفحة دي أهمّ بياناته، يعني مثلاً يكتب:
الاسم، تاريخ الميلاد، المهنة أو الوظيفة إن وُجد، الإيميل، مجال الكتابة، أهم إنجازاته الأدبية، اللي أصدره من دواوين أو نُشر له من أعمال... وياريت يختم لنا هذه السيرة الذاتية المختصَرة بمقطوعة من شعره تعبِّر عنه.
أعتقد إن بالطريقة دي هيكون بيننا حالة جميلة من التواصل، نتمنّى إنها تفضل بيننا باستمرار...
وانا هابدأ بنفسي:

الاسم: محمود عبد الرازق جمعة.
تاريخ الميلاد: 19 سبتمبر 1980.
المهنة: مصحح لغوي.
البريد الإلكتروني:
gomahh@hotmail.com، rekhem2000@yahoo.com
الإنجازات الأدبية:
- المركز الأول على الجمهورية في مسابقة مؤسسة اقرأ الخيرية عام 2004م.
- المركز الثاني على الوطن العربي في مسابقة مجلة "تراث الإماراتية" في أبريل 2001م.
- المركز الأول على جامعات مصر في المسرح الشعري في أسبوع شباب الجامعات السادس في جامعة أسيوط فبراير 2003م.
- حصلت على المركز الأول على جامعات مصر في الشعر الفصيح في ملتقى الأدباء الشباب الأول في جامعة المنصورة يوليو 2004م.
- قُرِّرَ بعض من قصائدي الشعرية في كتاب "المدخل إلى علمي العروض والقافية" لتعليم فنّ العروض مقرَّر على بعض دفعات قسم اللغة العربية بكليتَي التربية بجامعة المنصورة وجامعة عين شمس.
- نُشر لي بعض الأعمال في المجلات والجرائد المصرية والعربية مثل مجلة "الثقافة الجديدة" ومجلة "تراث" الإماراتية" وجريدة "الأهرام الدولي".
- لي ديوان فصحى بعنوان "لا تعذريني" عام 2005م.
ممّا كتبت:
إذا عاتَبْتِنِي
لا تَعْذُرِينِي
وإِنْ أَبْصَرْتِ دَمْعِي
لا تَلِينِي
وكُونِي مِثْلَمَا قَدْ كُنْتِ دَوْماً
فُؤَاداً
لا يُعَذِّبُهُ أَنِينِي
كَأَنَّكِ آهَةٌ
دُونَ انْتِهَاءٍ
يُسَطِّرُهَا الزَّمَانُ
عَلَى جَبِينِي
فَأُبْحِرُ فِي الْعُيُونِ
بِلا شِرَاعٍ
وأَرْجِعُ
والنَّدَامَةُ فِي عُيُونِي
كَأَنِّي قُدَّ قَلْبِي مِنْ خَطَايَا
وأَنَّكِ
لَسْتِ مِنْ مَاءٍ وَ طِينِ

مش فاهم حاجة

بصراحة أنا مش فاهم...
دي المرة التاسعة تقريباً اللي أعمل فيها البلوج بتاعي، وكل مرة أحاول أدخله يطلع لي سبب يخليني ماعرفش أفتح البلوج:
مرة مايقبلش الباسوورد
ومرة تانية مايقبلش كلمة السر
ومرة تالته مايقبلش كلمة المرور
ومرة رابعة مايقبلش...
وخامسة..............
وتاسعة...............
وهكذا، كل مرة بسبب غير اللي قبلها... لغاية ما زهقت...
كان واضح طبعاً إن البلوج بيرخِّم عليا، لأنه في كل مرة كان اسمه مشتقّ من مشتقّات الرخامة، يعني مرة كان اسمه "الرخم"، ومرة كان اسمه "رخم"، ومرة "محمود الرخم"، ومرة "الرخم جداً"...
ودي المرة العاشرة اللي أعمل فيها البلوج، وأتمنى تكون العاشرة تابته...
أتمنى أقدر أردّ عليكم في البلوج ده، لأنه لو مانفعش ماظنّش إني هيكون عندي طاقة أعمل بلوج حداشر...
يلاّ، ربّنا يوفقكم